10-14- октябрь күндөрү Бишкек-Нарын-Торугарт унаа жолунун 129-чакырымында кооптуу таштарды түшүрүү жумуштары жүргүзүлөт

10 Октября 2022

2022-жылдын 10-октябрынан 14-октябрына чейин (аба ырайынын шарттарын эске албаганда) Бишкек-Нарын-Торугарт унаа жолунун 129-чакырымында, Боом капчыгайы (темир жолдун 3899-чакырымы), кооптуу таштарды түшүрүү иштери жүргүзүлөт.

Бул тууралуу  “Кыргыз темир жолу” УК” МИсы маалымдайт.
Иштин башталышы керектүү адамдык, техникалык каражаттарды жана механизмдерди даярдоо менен автотранспорттун жана темир жолдун кооптуу участокторун тосуу аркылуу жүргүзүлөт.  

Иш жергиликтүү убакыт боюнча саат 09:00дөн 15:00гө чейин КР ИИМдин жол кыймылын коопсуздугун камсыздоо боюнча башкармалыгынын кызматкерлери тарабынан жол жарым-жартылай тосулгандан кийин, күндүзгү убакытта жүргүзүлөт. Жолду тазалоо учурунда унаалар бир тилкеге гана багытталат.

30-40тан ашык унаанын топтолгон учурда таштарды түшүрүү иштери токтотулуп, унааларды өткөрүүгө уруксат берилет.
Иш-чаралар таш кулоо коркунучун алдын алуу максатында жүргүзүлөт.